Астана қаласы, 2026 жылғы 17 маусым.
Қазақстан Республикасы Президенттік орталығында Қазақстан Республикасының мәдениет қайраткері, Қазақстан Суретшілер одағының мүшесі, Қазақстан Республикасы Көркемөнер академиясының мүшесі, Ресей Көркемөнер академиясының құрметті мүшесі, ТҮРКСОЙ-дың құрмет медалінің иегері Нелли Бубэнің «Көпқырлы Еуразия» атты жеке көрмесінің ашылу рәсімі өтті. Аталған іс-шараға Конфессияаралық және дінаралық диалогтың халықаралық орталығы қатысты.
Көрменің салтанатты ашылуына Қазақстанның мемлекет және қоғам қайраткері Бірғаным Әйтімова, Халықаралық ғылым және білім академиясының академигі, Ресей жаратылыстану ғылымдары академиясының академигі, философия ғылымдарының докторы, профессор Сабина Аязбекова шақырылды. Құрметті қонақтар қатарында Конфессияаралық және дінаралық диалогтың халықаралық орталығының Басқарма төрағасы Гүлсана Қожабай, «Қазақстан заңгерлер одағы» қоғамдық бірлестігінің төрағасы, 2026 жылғы Конституциялық реформа жөніндегі комиссияның мүшесі Серік Ақылбай, белгілі суретшілер Камил Муллашев пен Өмірәлі Исмаилов, сондай-ақ дипломатиялық корпус өкілдері мен мәдениет қайраткерлері болды.
Қазақстан Республикасы Президенттік орталығының директоры Темірболат Бақытжан құттықтау сөзінде Президенттік орталық алаңында өтіп жатқан көрменің мәдени және қоғамдық маңызына тоқталды. Салтанатты рәсім барысында Темірболат Бақытжан Қазақстан Республикасы Премьер-Министрінің орынбасары – Мәдениет және ақпарат министрі Аида Балаеваның құттықтау хатын оқып берді. Құттықтауда автордың ұлттық өнерді дамытуға және еліміздің мәдени мұрасын сақтауға қосқан елеулі үлесі ерекше атап өтілді.
Көрме көшпелі өркениеттің дәлелі ретінде қарастырылатын көшпенді бейнесінің көпқырлы болмысын көркемдік тұрғыдан пайымдауға арналған. Онда дәстүр, мәдениет, өмір салты және діни наным сияқты әртүрлі элементтер бір-бірінен оқшау өмір сүрмей, тұтас бір мағыналық кеңістікті қалыптастырады. Өзінің картиналары арқылы автор көшпенділердің мәдени кодының қалыптасу дәуіріне үңіліп, оның тарихи және рухани қалыптасу үдерісін ашады.
Нелли Бубэнің жұмыстары табиғатпен толық үйлесімде өмір сүрген көшпенділердің экологиялық тұрғыдан таза өмір салтын бейнелейді. Автор өз шығармалары арқылы жер мен жануарлар әлеміне ұқыпты қарауға үндейді, өйткені олар өркениеттің қысымынан зардап шегіп отыр. Бубэнің көркемдік ізденістері түп-тамырға қайта оралу және қоршаған ортаға құрметпен қарау – қазіргі экологиялық сын-қатерлерді еңсерудің жалғыз жолы екенін айқындайды.
Көрменің ерекше маңызы оның Әлемдік және дәстүрлі діндер лидерлері Съезінің негізгі бастамаларымен үндестігінде, соның ішінде «Діндердің климаттың өзгеруімен күрестегі рөлі» құжатымен сәйкестігінде жатыр. Бұл құжатта жауапкершілік, гуманизм және адамның табиғатпен үйлесімді өмір сүруі қағидаттары бекітілген. Осы тұрғыда Нелли Бубэнің көркем тілі аталған ұстанымдармен үндес келетін ортақ идеяларды бейнелейді.
Суретшінің шығармашылығы географиялық шекаралардан асып түсіп, Шығыс пен Батысты біртұтас Еуразиялық мәдени кеңістікке біріктіреді. Сарапшылардың пікірінше, оның өнері әртүрлі өркениеттерді, ұрпақтар мен мемлекеттерді жақындастыратын рухани құндылықтарды бейнелейді.
Экспозицияның өзегінде бірлік пен диалогтың символы ретінде Ұлы дала бейнесі көрініс табады. Нелли Бубэнің картиналары үйлесім мен қақтығыстың болмауына негізделген қатар өмір сүру моделін көрсетеді. Шығармалардағы түстік шешімдер рухани тұтастықты және өзара толықтыру идеясын айқындайды.
Бұл философия Әлемдік және дәстүрлі діндер лидерлері Съезі идеяларында көрініс табады. Аталған Съезд әлемнің әртүрлі елдерінен келген діни көшбасшылардың ашық диалогы мен өзара әрекеттесуіне арналған бірегей алаң қалыптастырып, жаһандық сын-қатерлерге бірлесіп шешім іздеуге бағытталған.
Осы тұрғыда Нелли Бубэнің көркем бейнелері де дәл осы бірлік идеясын бейнелейді. Түрлі халықтар мен мәдени дәстүрлер ортақ әлемнің бөлшектері ретінде ұсынылып, рухани құндылықтар оларды бөліп-жармай, керісінше біріктіретіні көрсетіледі.
Оның шығармаларында көшпенділер коды, яғни адам бейнесі рухани мағыналар мен моральдық бағдарлардың иесі ретінде орын алады. Осы құндылықтар негізінде тұтастық қалыптасады.
