ӘЛЕМДІК ЖӘНЕ ДӘСТҮРЛІ ДІНДЕР ЛИДЕРЛЕРІНІҢ VIII СЪЕЗІ
2025 жылғы 17-18 қыркүйекте Қазақстанның астанасы – Астана қаласында Әлемдік және дәстүрлі діндер лидерлерінің VIII съезі өтті. Бұл маңызды іс-шара Қазақстан Республикасы Президенті Қасым-Жомарт Тоқаевтың төрағалығымен ұйымдастырылды. Аталған ауқымды оқиға Қазақстанның конфессияаралық және дінаралық диалогты дамытудағы халықаралық алаң ретіндегі маңызды рөлін тағы да дәлелдеді.
Форум жұмысына әлемнің шамамен 60 елінен келген 100-ден астам делегация қатысты. Олардың қатарында ислам, христиан, буддизм, иудаизм, индуизм, даосизм, зороастризм, синтоизм сияқты ірі әлемдік діндердің рухани лидерлері, сондай-ақ халықаралық ұйымдардың, ғылыми қауымдастықтың, саяси орта мен азаматтық қоғамның өкілдері болды. Қатысушылар жаһандық сын-қатерлерді еңсеруде адамгершілік пен рухани құндылықтар негізінде күш біріктірудің маңыздылығын атап өтті.
Съездің негізгі тақырыбы: «Діндер диалогы: болашақ жолындағы синергия» болды. Талқылаулар қазіргі өзекті мәселелерге арналды, соның ішінде: жаһандық бейбітшілік пен тұрақтылықты қамтамасыз етудегі діндердің рөлі, цифрлық дәуірдің этикалық сын-қатерлері, жасанды интеллекттің қоғамға әсері, сондай-ақ зорлық-зомбылыққа, радикализмге және діни алауыздыққа қарсы іс-қимыл мәселелері қаралды.
Съезд аясында секциялық отырыстар, панельдік пікірталастар, сондай-ақ Жас діни лидерлерінің ІІ форумы өтті. Бұл алаңда рухани лидерлердің жаңа буыны бейбітшілік, өзара түсіністік пен конфессияаралық ынтымақтастық идеалдарына адалдығын білдірді.
Съездің қорытындысы ретінде «Астана бейбітшілік Декларациясы 2025» қабылданды. Онда діндер арасындағы сенімді нығайтудың, мәдени әртүрлілікті құрметтеудің және мейірімділік, қайырымдылық пен әділеттілік құндылықтарына негізделген ортақ болашақ көрінісін дамытудың қажеттілігі атап өтілді.
