Түркістан, 2026 жылғы 25 мамыр
Конфессияаралық және дінаралық диалогтың халықаралық орталығы Қожа Ахмет Ясауи атындағы Халықаралық қазақ-түрік университетінде Әлемдік және дәстүрлі діндер лидерлерінің Съезі аясында қабылданған «Астана бейбітшілік декларациясы 2025» құжатын ілгерілету бойынша дәріс өткізді.
Кездесуге Теология факультетінің студенттері, оқытушылар мен университет өкілдері қатысты.
Теология факультеті деканының орынбасары Динара Жарқынбаева өзінің алғы сөзінде бұл дәрістің жастарды мәдениеттер мен діндер арасындағы құрмет, өзара түсіністік және ашық диалог рухында тәрбиелеу үшін маңыздылығын атап өтті.
Орталықтың Әдістемелік жұмыс және жинақтау департаментінің аға сарапшысы Жансұлу Мазан студенттерге жиырма жылдан астам уақыт бойы түрлі конфессиялар мен діндер арасында диалог құрудың бірегей халықаралық алаңы болып табылатын Әлемдік және дәстүрлі діндер лидерлері Съезінің тарихы туралы айтып берді.
«Астана бейбітшілік декларациясы 2025» құжатының мазмұнына ерекше назар аударылды. Ол декларацияның жасанды интеллектіні пайдаланудың әдептік принциптерін қалыптастырудан бастап, қоршаған ортаны қорғау мен климаттың өзгеруіне дейінгі негізгі ережелерін егжей-тегжейлі түсіндірді.
Студенттер арасында декларацияның жастар мен әйелдерді дінаралық және мәдениетаралық диалог үдерістеріне тартуға арналған ережелері ерекше қызығушылық тудырды. Дәріс қазіргі әлемдегі діннің рөлі мен дінаралық диалогтың болашағы туралы қызу пікірталаспен жалғасты.
Жансұлу Мазан «Астана бейбітшілік декларациясы 2025» құжаты әлемдік қоғамдастықтың сенімді, әділдікті және ынтымақтастықты нығайтуға деген ұмтылысын көрсететінін атап өтті. Құжат он тілге аударылып, Съездің халықаралық серіктестері арасында БҰҰ Бас Ассамблеясының 80-ші сессиясының ресми құжаты ретінде таратылды. Сонымен қатар, декларация Қазақстан Республикасының Президенті Қасым-Жомарт Тоқаевтың Бейбітшілік үшін жаһандық қозғалыстың жаңа тұжырымдамасын қалыптастыру туралы үндеуін айқындайды.
