Астана қ., 2026 жылғы 20 мамыр
Дінтану сараптамасы департаментінің директоры Эльмира Бірәлі Қазақстан мұсылмандары діни басқармасы ұйымдастырған «Діни сараптама жүргізудің заманауи әдістері мен құқықтық негіздері» республикалық форумына қатысты.
Форум барысында қатысушылар діни сараптама жүргізудің заманауи тәсілдерін, реттеудің құқықтық тетіктерін, сондай-ақ дін саласындағы ақпараттық және қоғамдық қауіпсіздікті қамтамасыз етуге байланысты өзекті мәселелер мен сын-қатерлерді талқылады.
Іс-шара аясында Эльмира Бірәлі «Дін саласындағы ақпараттық материалдарға кешенді талдау жүргізу ерекшеліктері» тақырыбында баяндама жасады. Ол өз сөзінде ақпараттық қауіпсіздікті қамтамасыз етудегі және деструктивті мазмұнды таратуға қарсы тұрудағы дінтану сараптамасының рөліне егжей-тегжейлі тоқталды.
Спикердің айтуынша, қазіргі жағдайда дін рухани құндылықтар мен нанымдар жүйесі ретінде ғана емес, сонымен қатар әлеуметтік желілер, мессенджерлер және цифрлық платформалар арқылы белсенді түрде таралатын ауқымды ақпараттық құбылыс ретінде де әрекет етеді. Осыған байланысты сарапшының бүгінгі міндеті тек мәтіндік материалдарды талдау ғана емес, сонымен қатар сандық мазмұнның, соның ішінде deepfake технологиясының қоғамдық сана мен қауіпсіздікке әсерін бағалау болып табылады.
Іс-шара соңында Қазақстан мұсылмандары діни басқармасының Төрағасы, Бас мүфти Наурызбай қажы Тағанұлы осы саланы дамытуға қосқан үлесі үшін Эльмираға алғыс хат табыс етті.
