ҚР Дін істері және азаматтық қоғам вице-министрі Берік Арын бастаған қазақстандық делегация БҰҰ штаб-пәтерінде (Нью-Йорк қаласы) ұйымдастырылған БҰҰ Қауіпсіздік Кеңесінің отырысына қатысты, деп хабарлайды ҚазАқпарат ҚР Дін істер және азаматтық қоғам министрлігінің баспасөз қызметіне сілтеме жасап.
Аталмыш жиынға делегация өкілдері ағымдағы жылғы қазанда Астана қаласында өтетін Әлемдік және дәстүрлі діндер лидерлерінің VI съезіне арналған «Қауіпсіз әлем үшін діндер лидерлері» тақырыбындағы Аррии формуласына сәйкес қатысқан болатын. Іс-шара БҰҰ Өркениеттер Альянсымен бірлесе отырып Қазақстан Республикасының Біріккен Ұлттар Ұйымының жанындағы Тұрақты өкілдігі тарапынан ұйымдастырылды. БҰҰ Өркениеттер Альянсының Жоғары өкілі Насир Әбдел Әзиз Ан-Насeрдың және БҰҰ жанындағы Қазақстан Республикасының Тұрақты өкілі Қайрат Омаровтың төрағалық етуімен өткен форумға БҰҰ Қауіпсіздік кеңесіне мүше мемлекеттердің, үкіметтік емес ұйымдардың өкілдері, «Діндер бейбітшілік үшін» дүниежүзілік конференциясының Бас хатшысы Уильям Вендли, БҰҰ жанындағы Діни үкіметтік емес ұйымдары комитетінің президенті Свами Парамешананда, «Ист парк Синагог» діни көшбасшысы Раввин Артур Шнайер және басқалары қатысты.
Аталмыш отырыс БҰҰ Өркениеттер Альянсының Жоғары өкілі Насир Әбдел Әзиз Ан-Насeрдің БҰҰ Бас хатшысы Антониу Гутерриштың атынан іс-шараға қатысушаларға арналған құттықтау сөзімен ашылды. ҚР Дін істері және азаматтық қоғам вице-министрі - Съездің мақсаттары мен міндеттерін ілгерілету жөніндегі уәкілі Берік Арын ҚР Парламенті Сенатының Төрағасы, Әлемдік және дәстүрлі діндер лидерлері съезі хатшылығының басшысы Қасым-Жомарт Тоқаевтың атынан презентациялық баяндамамен сөз сөйледі. Б. Арын қатысушыларды Қазақстанның этносаралық және конфессияаралық келісімді қамтамасыз етудегі тәжірибесімен таныстыра отырып, БҰҰ және басқа да халықаралық ұйымдардың миссиясымен және басымдықтарымен үндескен Әлемдік және дәстүрлі діндер лидерлерінің съезін шақыру бойынша Президент Н.Ә.Назарбаевтың жаһандық бастамасы туралы толық айтып берді.
Атап айтқанда, вице-министр өзінің 15 жылдық тарихында Съезд әрқашан күрделі жаһандық процестердің шыңында өткізілгеніне назар аударды. Бүгінгі жағдайда халықаралық қатынастарға деген сенімнің жоқтығы, жаңа сын-тегеуріндер мен қауіп-қатерлердің, жергілікті соғыстар мен әлемнің бірнеше өңірлеріндегі радикалды қозғалыстарды жандандырудың пайда болуына байланысты екендігі айтылды. Сонымен қатар әлемдегі қауіпсіздік пен тұрақтылықты қамтамсыз ету жолында діни лидерлер мен әлемдік саясаткерлердің күш-жігерін біріктіру қажеттігі бойынша мәселенің де өзекті екендігі сөз болды. Осыған байланысты БҰҰ мүше-мемлекеттер және халықаралық ұйымдар тарапынан жаһандық деңгейде дінаралық диалогты ілгерілету ісіне күш-жігер үлесін қосуға мүмкіндік беретін аталған форумның жұмысына белсенді қатысулары арқылы Мемлекет басшысымыздың бастамасын кеңінен қолдауға үміт артатынын білдірді.
Іссапар шеңберінде вице-министр Б.Арынның «Діндер бейбітшілік үшін» дүниежүзілік конференциясының Бас хатшысы Уильям Вендлимен және БҰҰ Өркениеттер Альянсының Жоғары өкілі Насир Әбдел Әзиз Ан-Насeрмен екіжақты кездесулері өткізілді. Кездесулерде Б.Арын Съезд Хатшылығының Басшысы, ҚР Парламенті Сенатының Төрағасы Қ.Тоқаевтың атынан VI Съезге қатысу үшін шақыру хаттарын табыстап, сұхбаттастарды алдағы форумның күн тәртібімен таныстырды, сондай-ақ Қазақстанның «Діндер бейбітшілік үшін» ұйымымен және Өркениеттер Альянсымен ынтымақтастығын дамыту мәселелерін талқылады.
У. Вендли және Н. Ан-Насер шақыруды ризашылықпен қабылдап, Съезд жұмысына өздерінің қатысатындықтарын жеткізді.
