Бұл туралы Facebook-тегі парақшасында ҚМДБ баспасөз хатшысы Ағабек Қонарбайұлы жазды, деп хабарлайды BAQ.KZ.
16 қыркүйекте елордадағы Республикалық бас мешітте әл-Азһар шейхы, Жоғарғы имам Ахмед Тайыптың жұма уағызын айтатыны жөнінде хабарлаған болатынбыз. Бұл – ел мұсылмандары үшін айтулы оқиға. Ал әл-Азһар шейхының Қазақстанға келуінің қандай маңызы бар?
Әл-Азһар шейхы, Жоғарғы имам – ислам жетекшілерінің ең жоғары атағы. Тарихқа көз салсақ, 1679-2022 жылдар аралығында 50 дін қайраткері әл-Азһардың Жоғарғы имамы болды. Алғашқылары Мұхаммед әл-Хараши, Ибрагим әл-Бармауи, Мұхаммед ан-Нашарти болса, 1980 жылдардан бастап Мұхаммед Әбдірахман Бисар, Джад әл-Хак, Мухаммад Саид Тантауи және Ахмед ат-Тайып бұл атаққа ие болды, - деп жазды ол.
Сондай-ақ шейх Ахмед Тайып – Пайғамбарымыздың (оған Алланың салауаты мен сәлемі болсын) ұрпағы. Дін қайраткері саңлақ сахаба Әли ибн Әбу Тәліп пен Фатима анамыздың ұлы Хасаннан (Алла баршасына разы болсын) тарайды.
Ахмет Тайып 2010 жылы тарихи тұрғыдан ислам әлемінің негізгі білім, ғылым және рухани орталықтарының бірі – әл-Азһардың Жоғарғы имамы атанды. Әрі ол бұрын университетті өзі де басқарған, сонымен қатар Мысырдың бас мүфтиі болған.
Елорда тұрғындары мен қала қонақтарын, барша мұсылман жамағатын айтулы шараға, яғни Ислам әлемінің беделді тұлғасы айтатын жұма уағызына шақырамыз. Бас мешітке келуші жамағатқа көлікпен кіру-шығу жолдары төмендегі картада нақты көрсетілген, - деді ол.
https://baq.kz/al-azhar-sheyhynyn-elimizge-keluinin-qanday-manyzy-bar-287019/
