Конфессияаралық және дінаралық диалогтың халықаралық орталығы Басқарма төрағасы Гүлсана Қожабай Аргентинадағы Ахмадийя Мұсылман қауымдастығының президенті Имам Марван Гиллмен онлайн кездесу өткізді. Кездесудің мақсаты Әлемдік және дәстүрлі діндер лидерлері съезі аясындағы ынтымақтастықтың географиясын кеңейту жолдарын талқылау болды.
Тараптар 2025 жылғы қыркүйекте Астанада өткен VIII Съездің қорытындылары мен негізгі идеяларын талқылап, оның жаһандық дінаралық диалогты нығайтудағы стратегиялық маңызын атап өтті. Аргентиналық тарап күрделі геосаяси жағдайда өткеніне қарамастан, Съездің жоғары өкілдік деңгейде ұйымдастырылғанын жеткізді.
Имам Марван Гилл Латын Америкасы елдері арасында Қазақстанның диалогтық бастамаларына қызығушылықтың артып келе жатқанын айтты. Әңгіме барысында жасанды интеллект этикасы мен климаттық дағдарыс сияқты өзекті жаһандық мәселелерді қамтитын «Астана бейбітшілік декларациясы 2025» құжатында ұсынылған бастамаларға ерекше назар аударылды. Имам осы және өзге де басым бағыттарды ілгерілетуге арналған өңірлік іс-шараларды өткізуге қолдау көрсетуге дайын екенін білдірді.
Гүлсана Қожабай Марван Гиллге дінаралық бастамаларды ілгерілетуге қосқан белсенді үлесі үшін алғыс білдіріп, Америка мемлекеттері ұйымымен (АМҰ) және Бейбітшілік университетімен (UPEACE) стратегиялық әріптестікті дамыту перспективаларын талқылады. Марван Гилл аталған құрылымдардың басшылығына кеңесші ретінде қызмет етеді. Ал Бейбітшілік университеті – БҰҰ жүйесіне кіретін бейбітшілік мәселелеріне маманданған жалғыз академиялық оқу орны.
Тараптар жақын уақытта университет басшылығымен онлайн форматта кездесу ұйымдастыруға уағдаласты. Бұл бағыт Съездің ғылыми алаңы саналатын Эксперттік дөңгелек үстелдің жыл сайынғы жұмысы тұрғысынан да өзекті екені атап өтілді.
Сонымен қатар, Орталық пен Аргентинадағы Ахмадийя Мұсылман қауымдастығы арасындағы практикалық ынтымақтастықты кеңейту мүмкіндіктері, соның ішінде бірлескен сапарлар ұйымдастыру және ынтымақтастық туралы меморандумға қол қою мәселелері қарастырылды.
Орталық Басқарма төрағасы Марван Гиллдің бейбітшілік елшісі ретіндегі қызметін атап өтіп, оның дінаралық диалог пен өзара сенімді нығайтуға қосқан үлесіне ерекше тоқталды.
Кездесу барысында Гүлсана Қожабай шетелдік әріптеске Орталықтың ағымдағы жылға жоспарланған негізгі іс-шаралары туралы ақпарат берді. Олардың қатарында қазан айына жоспарланған Съезд Хатшылығының XXIV отырысы, Эксперттік дөңгелек үстел, сондай-ақ халықаралық конференциялар мен семинарлар сериясы бар.
Кездесу қорытындысында тараптар дінаралық диалогты дамытуға және «Астана бейбітшілік декларациясы 2025» қағидаттарын ілгерілетуге бағытталған бірлескен жобаларды жүзеге асыруға дайын екендерін растады.
