17 қазан күні Конфессияаралық және өркениетаралық диалогты дамыту жөніндегі Н.Назарбаев орталығында «Рухани келісім: бастауы, ахуалы, болашағы» тақырыбында халықаралық конференциясы өтті. Шара Рухани келісім күніне орайластырылған.
Конференцияға Ұлыбританиядағы Англикан қауымдастығы Бас хатшысының орынбасары, епископтық қызмет мәселелері жөніндегі Епископ Джо Бэйли Уэллс, Исламабад ислам университетінің Ислам ғылыми-зерттеу институтының директоры, профессор Мұхаммед Зия-ул-Хақ, Үндістандағы «Сомайя Видьявихар» институтының конфессияаралық қарым-қатынас және өзара түсіністік бағдаламасының Хатшысы Рудракша Сакрикар, Дүниежүзілік буддистер қауымдастығының өкілі, доктор Арифин Яма онлайн форматта, сонымен қатар ҚР мемлекеттік орган және діни бірлестік өкілдері қатысты.
Конференция аясында ынтымақтастық пен рухани келісімді нығайту, қазіргі алмағайып заманда түрлі этникалық топтар және түрлі конфессия өкілдері арасында толеранттылық принципін ілгерілетіп, тұрақтылықа һәм адами құндылықтарды сақтау мәселелері талқыланды.
Өз алғысөзінде Н.Назарбаев орталығы Басқарма Төрағасының м.а. Д.Есенова: «Мемлекет басшысы Қасым-Жомарт Тоқаев: «Біздің басты байлығымыз – береке мен бірлік, тұрақтылық пен тыныштық, бейбітшілік пен келісім» деді. Қазақстан жаһандық өзгерістер мен қайшылықтардың қиын кезеңдерінде рухани келісім идеясын қуатты күшке айналдыра білген әлемдегі алғашқы мемлекеттердің бірі» деп атап өтті.
Ал Мәртебелі Джо Бейли Уэллс болса «...біздің әлемге рухани үйлесімділік және түрлі көзқарас иелерінің біріге жұмыстану мүмкіндігі керек. Біздің әлем «оркестрінің» мүшелері бар және олар түрлі дыбыс шығаратын түрлі аспапта ойнайды. Құдай аспан мен жерді жаратқанда, осы үйлесім үшін жаратқан».
«Конференция әртүрлі рухани қауымдастықтар, мәдениеттер мен ұрпақтар арасындағы өзара түсіністікті, ынтымақтастықты дамыту және сенімді нығайту жолындағы маңызды қадам болып табылады. Ал бұл идеялар, бастамалар мен өзгерістер ағынында жастардың алатын орны зор. Өйткені, оң идеологиялық бағыттарды қалыптастыруда әртүрлі конфессиялардың жас көшбасшылары басты рөл атқара алады», - деп атап өтті өз сөзінде «Жастар» ғылыми-зерттеу орталығының директоры А.Ерниязова.
Конференция қорытындысы бойынша қатысушылар Орталықтың іс-шараны ұйымдастыру жөніндегі бастамасын оң бағалап, конфессияаралық және мәдениетаралық диалогты одан әрі ілгерілетуге келісті.
