Париж, 2022 жылғы 3 маусым - Әлемдік және дәстүрлі діндер лидерлерінің VII Съезі қарсаңында Франция Республикасындағы Қазақстан Елшілігі Конфессияаралық және өркениетаралық диалогты дамыту жөніндегі Н.Назарбаев орталығының қолдауымен француз дін өкілдерінің, ғылыми және сарапшылар тобының, халықаралық ұйымдардың, сондай-ақ дипломатиялық және БАҚ өкілдерінің қатысуымен «Бейбітшілік пен келісім үшін конфессияаралық диалог» тақырыбында халықаралық дөңгелек үстел өткізді.
Атап айтқанда, конференция жұмысына Қазақстан Республикасы Сыртқы істер министрінің бірінші орынбасары – Әлемдік және дәстүрлі діндер лидерлері Съезі Хатшылығы төрағасының орынбасары А.Рахметуллин, Конфессияаралық және өркениетаралық диалогты дамыту жөніндегі Н.Назарбаев орталығының Басқарма Төрағасы, Әлемдік және дәстүрлі діндер лидерлері Съезінің мақсаттары мен міндеттерін ілгерілету жөніндегі уәкілі Б.Сәрсенбаев, ЮНЕСКО өкілі Д.Монтейра, Францияның Сыртқы істер министрлігі Т.Морель, Страсбург университетінің президенті М.Денекен, жазушы, журналист, қоғам қайраткері М.Халтер, бірқатар діни қызметкерлер мен БАҚ өкілдері қатысты.
Қазақстанның Француз Республикасындағы Елшісі Жан Ғалиев конференция қатысушыларына алғы сөз сөйледі. Елші Қазақстанның көпұлтты және көпконфессиялы қоғам, күрделі геосаяси ортада бола отырып, жаңа геосаяси шындықтардан тыс қала алмайтынын атап өтті, сондықтан Әлемдік және дәстүрлі діндер лидерлерінің Съезін ұйымдастыру туралы ауқымды бастаманың туындауына ықпал еткен нақты іс-қимылдарды қабылдауға кіріскенін хабарлады. Бұл дінаралық форумның маңызды ерекшелігі оның қатысушыларының кең және өкілетті құрамы болып табылады. Сонымен, Съезге ислам, христиан, иудаизм, буддизм, индуизм, даосизм, синтоизм, зороастризм, діни және қоғамдық ұйымдардың өкілдері, сондай-ақ беделді әлемдік саясаткерлер қатысады.
Министрдің бірінші орынбасары А.Рахметуллин өз сөзінде Съезді өткізудің маңыздылығы мен өзектілігі қазіргі болжамсыздықпен жалпы әлемдегі жаһандық ахуалдың шиеленісуімен байланысты екенін атап өтті. Сондай-ақ, ол болып жатқан халықаралық саяси және әлеуметтік-экономикалық процестер конфессияаралық және дінаралық қатынастарға тікелей әсер ететінін айтты. Оның пайымдауынша, діни лидерлер Съезд алаңын пайдалана отырып, белсенді ұстанымға ие болып, пандемиядан кейінгі кезеңде қазіргі заманғы рухани проблемаларды шешуде көзқарастардың бірлігін көрсетуі тиіс. Бұл ретте А.Рахметуллин VII Съезд кезекті рет өзекті сын-тегеуріндерді талқылау, сондай-ақ жаңа шынайылық жағдайында одан арғы іс-қимылдарды бірыңғай пайымдауды айқындау орнына айналады деп үміттенетінін мәлімдеді.
Өз кезегінде Басқарма Төрағасы Б. Сәрсенбаев, Әлемдік және дәстүрлі діндер лидерлері Съезінің мақсаттары мен міндеттерін ілгерілету жөніндегі уәкіл ретінде қазіргі заманғы сын-тегеуріндер мен қауіптердің ушығуы аясында өзінің өзектілігі мен қажеттілігін көрсеткен, Съездің тарихы мен миссиясы туралы айтып берді. Сондай-ақ Съезд әлемдік діндер лидерлері мен ірі саяси қайраткерлердің бір-бірін тікелей тыңдап, ести алуы үшін олардың нәтижелі кездесулері мен коммуникациялық өзара іс-қимылын, әлемдік діндердің бай рухани мұрасын және өркениеттердің ортақ тарихи тәжірибесін, адамзаттың рухани және әлеуметтік дамуындағы әлемдік және дәстүрлі діндер лидерлерінің рөлін айқындау үшін пайдалануды қамтамасыз ететінін атап өтті.
Жалпы, дөңгелек үстелге қатысушылар конфессияаралық және өркениетаралық диалогты халықаралық деңгейде ілгерілетудің, әсіресе пандемия салдарын еңсеру үшін бірлескен күш-жігер тұрғысынан, сондай-ақ бейбітшілік пен өзара түсіністік мақсатында этносаралық және дінаралық келісімді талап ететін өңірлік қақтығыстарды шешу тұрғысынан маңыздылығын атап өтті.
