Өнер диалог алаңы ретінде: Астанада «Дюрер. Алхимия метаморфозалары» көрмесі таныстырылды
Конфессияаралық және дінаралық диалогтың халықаралық орталығының серіктестері – Лейла Махат пен «Құланшы» галереясы – елорда тұрғындары мен қонақтарын Солтүстік Қайта өрлеу дәуірінің көркемдік және зияткерлік мұрасымен таныстырады.
29 қазанда Астанадағы LM Kulanshi Art галереясында «Дюрер. Алхимия метаморфозалары» көрмесінің тұсаукесері өтті. Экспозиция Солтүстік Қайта өрлеу дәуірінің ең ұлы шеберлерінің бірі Альбрехт Дюрерге және өнер, математика мен табиғатты зерттеу тығыз байланыста болған сол дәуірдің зияткерлік әлеміне арналған.
Көрменің ашылу салтанатында Қазақстан Республикасындағы Қасиетті Тақтың Апостолдық нунцийі, архиепископ Джордж Панамтундил құттықтау сөз сөйледі. Ол жоғары технологиялар мен жасанды интеллект қарқынды дамыған ғасырда өнердің адамзат үшін ерекше құндылық пен маңызға ие болып қала беретінін атап өтті.
Өз кезегінде көрмені ұйымдастырушы, танымал суретші, галерист Лейла Махат көрмені дайындау бір жылдан астам уақыт алғанын және едәуір зерттеушілік пен шығармашылық жұмысты талап еткенін атап өтті. Оның айтуынша, көрме көрермендерді өткеннің бай мұрасымен таныстырып қана қоймай, адамның әлемді тануға, мағына іздеуге және рухани дамуға деген мәңгілік ұмтылыс туралы ойлануға шақырады.
Гравюралар, көне баспа кітаптар, алхимиялық трактаттар мен тарихи заттар сол дәуірдің табиғат, білім және өнер туралы түсініктерін ашып көрсетеді. Авторлығы әлі де зерттеу нысаны болып отырған «Пьета» гравюрасы ерекше орынға ие.
Көрме 2026 жылғы 30 қазанынан 2027 жылғы 24 қаңтарға дейін келушілер үшін көрсетілген мекенжай бойынша ашық болады: Астана қаласы, Қасым Аманжолов көшесі, 22А.
