Қазан, 2025 жылғы 31 наурыз – Қазақстан Республикасының Қазандағы Бас консулы Ерлан Ысқақов Татарстан Республикасы мұсылмандары діни басқармасының басшысы, Татарстан мүфтиі Камиль хазрат Самигуллинмен кездесті.
Қазақ дипломаты К. Самигуллинді мерейтойымен және жаңа мерзімге қайта сайлануымен құттықтап, Татарстан халқының өсіп-өркендеуі мен халықаралық беделінің нығаюына табыс тіледі.
Кездесу барысында дипломат этносаралық және конфессияаралық келісімді сақтаудың, барлық этностардың мүдделерін бекіткен азаматтық қоғам институты ретінде Қазақстан халқы ассамблеясын құрудың отандық тәжірибесі туралы егжей-тегжейлі айтып берді.
Сұхбаттастар Қазақстан мен Татарстан мұсылмандарының діни басқармалары арасындағы өзара іс-қимыл мәселелерін талқылады. Теологиялық білім беру және рухани-ағартушылық қызмет саласында кадрлар даярлаудың маңыздылығы аталып өтті. Қазіргі таңда 70-тен астам қазақстандық студент Ресей ислам институтында білім алуда.
Татарстан діни басқармасының басшысы құттықтау үшін алғысын білдіріп, ағымдағы жылдың қыркүйегінде Астанада өтетін Әлемдік және дәстүрлі діндер лидерлерінің VIII съезіне қатысатынын растады. Ол сондай-ақ Қазақстанның бейбітшілік пен ұлттық бірлікті ілгерілету жөніндегі күш-жігерін жоғары бағалап, түрлі діндер мен конфессиялар өкілдерінің диалогы үшін тұғырнама ұсына отырып, форум өзінің жоғары өзектілігін сақтайтынын атап өтті.
